勤奮訓練員喪行賺60萬XP 慘被Niantic當出千看待 - 2DJGAME! NOVO

各位訓練員見到有人一日內就由單位數字Lv升到幾十Lv，手握大群勁寵霸佔道館，理所當然會懷疑佢係「飛人」，或者開咗外掛、自動軟件刷XP。美國德州訓練員Jimmy Derocher以行動證明勤力都會有回報，喺一日內用正途方法賺取60萬XP，速度之快引來Niantic懷疑被出招招呼。
Derocher事前制訂詳細計畫，揀選咗一條全長0.2英里（約320m）、途經10個PokeStop嘅超級路線，同時整理出四大守則，包括每圈花費時數不得超過5分鐘、如非出現大量勁寵絕不停步慢慢捉、只可於PokeStop集中處（1-3號）稍事休息，以及不兜路以最短路徑行完一圈。夾埋班響應行動嘅朋友全程撒花兼用Lucky Egg，Derocher就開始進行呢個瘋狂實驗，頭12個鐘一切非常順利，透過捕捉、進化小精靈同拎補給獲得60萬XP。

不過就如我哋平時覺得賺咁快一定有問題，Niantic亦早已埋下防掛機制。其後任憑Derocher使用何種精靈球，所有小精靈均會逃跑，而轉動PokeStop亦毫無反應，顯然到達官方設定嘅每日XP賺取上限或速度，情況最後維持幾個鐘至回復正常。Niantic應該冇諗過玩家會沉迷到如斯地步，於是錯怪好人，但隨便解除限制等同放任出術，大概只能寄望唔會出現太多瘋狂玩家。